India Morning News
लातूर : महाराष्ट्राच्या राजकारणातील महत्त्वाचे नेते आणि माजी मुख्यमंत्री अशोक चव्हाण यांनी पुन्हा एकदा वादंग माजवणारे विधान केले आहे. काँग्रेस सोडल्यानंतर प्रथमच भाजपच्या सभेत बोलताना त्यांनी आपल्या आयुष्यातील कठीण प्रसंग मोकळेपणाने सांगितले. “गेल्या १४ वर्षांपासून मी राजकीय वनवास भोगत होतो. मला राजकारणातून संपवण्याचा डाव रचला गेला होता. अशा परिस्थितीतच मी भाजपचा मार्ग स्वीकारला,” असे ते म्हणाले.
लातूरमध्ये झालेल्या जाहीर सभेत चव्हाण यांनी विरोधकांवर टीका केली आणि महायुतीला दिलेला जनतेचा पाठिंबा अधोरेखित केला. “लातूर जिल्ह्यात सहा पैकी पाच जागा महायुतीकडे गेल्या. हे यश फक्त पंतप्रधान नरेंद्र मोदी यांच्या लोकप्रियतेमुळे शक्य झाले,” असे त्यांनी सांगितले.
त्यांनी पुढे भाजपला पूर्ण ताकदीने साथ देण्याचे आश्वासनही दिले. “काँग्रेससाठी मी जेवढा परिश्रम केला, तितकाच आता भाजपसाठीही करणार आहे. मोदीजी आणि फडणवीस साहेबांच्या मार्गदर्शनाखाली काम करण्याचा मी निर्णय घेतला आहे,” असे चव्हाण म्हणाले.
नांदेडमधील निवडणुकांचा संदर्भ देत ते म्हणाले, “एकजुटीने लढलो म्हणून नऊही जागा जिंकल्या. उमेदवार चांगला असेल तर जनता त्याला जरूर निवडून देते.”
सभेत त्यांनी विरोधी पक्षांवर जोरदार हल्ला चढवला. “उपराष्ट्रपती निवडणुकीतच विरोधकांचे मतभेद उघडकीस आले. लोकांना काहीही देऊ न शकणारे हे विरोधक आता हतबल झाले आहेत. त्यामुळे जनता भाजपकडे ओढली जाते,” अशी टीका त्यांनी केली.
तसेच, पाशा पटेल आता महायुतीसोबत असल्याचे त्यांनी नमूद करत बदललेली समीकरणे स्पष्ट दिसत असल्याचे सांगितले. शेवटी, मराठवाडा मुक्तिसंग्राम दिन आणि पंतप्रधान नरेंद्र मोदींचा वाढदिवस एकाच दिवशी साजरा होत असल्याची आठवण करून देत ‘मोदींचे काम जनतेपर्यंत पोहोचवा’ असे आवाहन करत त्यांनी भाषणाची सांगता केली.
Comments are closed