अमित शहा: घुसखोरांना देशाबाहेर हाकलू, राजकीय संरक्षण नको

Share News:

नागपूर: केंद्रीय गृहमंत्री अमित शहा यांनी शुक्रवारी कठोर भाषेत घुसखोरांविरोधात कारवाईचा इशारा दिला. नागपुरातील एका मीडिया कार्यक्रमात बोलताना शहा म्हणाले, “जर देशात कोणालाही अटीशिवाय येऊ दिले, तर भारत धर्मशाळा बनेल. घुसखोरीला राजकीय रंग देणे हे देशाच्या सुरक्षेसाठी गंभीर धोका आहे.”

शहा यांनी स्पष्ट केले की, घुसखोरांना कोणतेही राजकीय संरक्षण देऊ नये. “आम्ही घुसखोरांना शोधून काढू, मतदार याद्यांमधून त्यांची नावे वगळू आणि शेवटी त्यांना देशाबाहेर पाठवू,” असे त्यांनी ठामपणे सांगितले.

त्यांनी पुढे सांगितले की, “घुसखोर म्हणजे जे लोक धार्मिक छळ, आर्थिक किंवा इतर कारणांमुळे बेकायदेशीररित्या भारतात प्रवेश करतात.” शहा यांनी स्पष्ट केले की, देशाच्या सुरक्षेच्या दृष्टीने हे प्रकरण अत्यंत संवेदनशील आहे आणि त्यावर कोणताही राजकीय हस्तक्षेप होऊ नये.

अमित शहा यांनी SIR (Special Intensive Revision) अर्थात निवडणूक आयोगाच्या विशेष सघन सुधारणा प्रक्रियेवरही भाष्य केले. त्यांच्या म्हणण्यानुसार, ही प्रक्रिया राष्ट्रीय पातळीवर महत्त्वाची असून त्यात राजकीय हस्तक्षेप टाळला पाहिजे. “मतदार याद्यांमध्ये घुसखोरांचा समावेश करणे म्हणजे संविधानाच्या आत्म्याला भ्रष्ट करण्यासारखे आहे. मतदानाचा अधिकार फक्त देशातील नागरिकांनाच असावा,” असे शहा यांनी स्पष्ट केले.

शहा यांनी काँग्रेसवर निशाणा साधत म्हटले की, “विरोधक मनमानी वागत आहेत कारण त्यांच्या व्होट बँकेला धोका निर्माण झाला आहे. जर कुणाला या प्रक्रियेबद्दल आक्षेप असेल, तर न्यायालयाचा मार्ग खुले आहे.”

त्यांच्या या वक्तव्यानंतर राजकीय वर्तुळात चर्चा सुरू झाली असून, देशभरात घुसखोरीविरुद्धच्या धोरणाबाबत पुन्हा एकदा वादंग निर्माण झाला आहे.

Share News: