India Morning News
अयोध्या :जय श्रीराम! अयोध्येच्या पावन भूमीवर आज प्रभू श्रीरामांच्या भव्य मंदिरावर भगवा धर्मध्वज (केसरिया ध्वज) भव्य समारंभात फडकावण्यात आला. हा ऐतिहासिक क्षण पाहण्यासाठी देशभरातून लाखो रामभक्त दाखल झाले होते. मंदिराच्या १६१ फूट उंच शिखरावर हा धर्मध्वज स्थापित होताच उपस्थितांनी एकच घोषणा दिली – “जय श्रीराम… जय श्रीराम!”
राम जन्मभूमी तीर्थ क्षेत्र ट्रस्टच्या वतीने हा ध्वजारोहण सोहळा आयोजित करण्यात आला होता. ट्रस्टचे सरचिटणीस चंपत राय यांच्या हस्ते ध्वज फडकावला गेला. यावेळी उत्तर प्रदेशचे मुख्यमंत्री योगी आदित्यनाथ, संत-महंत, विश्व हिंदू परिषदेचे नेते तसेच देशभरातील प्रमुख हिंदू संघटनांचे पदाधिकारी उपस्थित होते.
“हे केवळ एक ध्वजारोहण नाही, तर पाचशे वर्षांच्या संघर्षानंतर हिंदू अस्मितेचा विजय आहे. प्रभू रामांचे मंदिर आणि त्यावर फडकणारा भगवा ध्वज हा हिंदू संस्कृतीचा, श्रद्धेचा आणि संकल्पशक्तीचा जिवंत दस्तावेज आहे,” असे भावूक उद्गार मुख्यमंत्री योगी आदित्यनाथ यांनी काढले.
२२ जानेवारी २०२४ रोजी प्राणप्रतिष्ठेनंतर अवघ्या दोन वर्षांत मंदिर पूर्णत्वाकडे वाटचाल करत असताना धर्मध्वजाची स्थापना हा रामनगरीच्या इतिहासातील आणखी एक सुवर्णक्षण ठरला आहे. या ध्वजाचे वैशिष्ट्य म्हणजे तो ५१ मीटर लांब आणि ३० मीटर रुंद असून त्यावर ‘जय श्रीराम’ अक्षरे सोनेरी रंगात कोरलेली आहेत.
देशभरातून रामभक्तांनी सोशल मीडियावर #धर्मध्वज_फडकला आणि #जय_श्रीराम हे ट्रेंड सुरू केले असून हा आनंदोत्सव संपूर्ण हिंदू समाज साजरा करत आहे.
