India Morning News
जळगाव : लग्नसराईच्या पार्श्वभूमीवर सोन्याच्या बाजारातून ग्राहकांसाठी मोठी दिलासादायक बातमी आली आहे. गेल्या काही दिवसांपासून सतत वाढत असलेले सोन्याचे दर आता लक्षणीयरीत्या घसरले आहेत. जळगावच्या सराफा बाजारात २४ कॅरेट सोन्याचा दर ₹१,२२,५०० वरून ₹१,१८,५०० प्रति १० ग्रॅमपर्यंत खाली आला आहे, म्हणजेच तब्बल ₹४,००० ची घसरण झाली आहे.
काही दिवसांपूर्वी सोन्याचा दर ₹१.३५ लाखांच्या उच्चांकावर पोहोचला होता. मागील दहा दिवसांपासून सुरू असलेल्या या घटेमुळे ग्राहकांमध्ये मोठा उत्साह दिसून येत आहे. देशभरातील सराफा बाजारातही अशीच परिस्थिती असून बुलियन असोसिएशनच्या आकडेवारीनुसार, सध्या २४ कॅरेट सोनं ₹१,२०,३८०, २२ कॅरेट ₹१,१०,३४८, आणि १८ कॅरेट सोनं ₹९०,२८५ रुपये प्रति १० ग्रॅम दराने उपलब्ध आहे.
चांदीच्या भावातही घट झाली असून, एक किलो चांदीचा दर ₹१,४६,३०० पर्यंत खाली आला आहे. आंतरराष्ट्रीय बाजारात अमेरिकन डॉलरच्या मजबुतीमुळे आणि अमेरिका-चीन व्यापार तणावात सैलपणा आल्याने सोन्याच्या दरावर दबाव वाढला आहे. गुंतवणूकदार सध्या नफावसुलीकडे वळले असल्याचे दिसते.
तज्ज्ञांच्या मते, भू-राजकीय स्थिरता आणि केंद्रीय बँकांकडून सुरू असलेली सोन्याची खरेदी यामुळे दर पुन्हा स्थिर होण्याची शक्यता आहे. दरम्यान, लग्नसराईच्या हंगामात ही घसरण ग्राहकांसाठी ‘सुवर्णसंधी’ ठरत आहे.
