बीड कारागृहात धर्मांतराचा आरोप; गोपीचंद पडळकरांचा गंभीर दावा

Share News:

बीड: भाजप आमदार गोपीचंद पडळकर यांनी बीड जिल्हा कारागृहातील अधिकाऱ्यांवर गंभीर आरोप केले आहेत. त्यांनी दावा केला की, कारागृहाच्या आत धर्मांतराची मोहीम राबवली जात असून हिंदू श्रद्धास्थानांची प्रतीके हटवण्यात आली आहेत.

पडळकर म्हणाले, “बीड जेलमध्ये छत्रपती शिवाजी महाराज आणि गणपती बाप्पाची मूर्ती काढण्यात आली, तसेच डॉ. बाबासाहेब आंबेडकर आणि महात्मा गांधींचे फोटो एका खोलीत ठेवले असून, त्यांच्या जागी बायबलमधील श्लोक लिहिले गेले आहेत. कैद्यांना भजन-कीर्तन करण्यास मनाई करण्यात आली आहे आणि धर्मांतरासाठी लाखो रुपयांची ऑफर दिली जात असल्याची माहिती मिळाली आहे,” असा आरोप त्यांनी केला.

या प्रकरणी पडळकर आणि आमदार सदाभाऊ खोत यांनी उपमुख्यमंत्री देवेंद्र फडणवीस यांची भेट घेऊन माहिती दिली. त्यांनी संबंधित अधिकाऱ्यांवर गुन्हा दाखल करण्याची, सीसीटीव्ही तपासणी करण्याची आणि दोषींवर कठोर कारवाईची मागणी केली आहे.

याच बैठकीत सांगली जिल्हा मध्यवर्ती बँकेतील नोकरभरतीतील अनियमितता आणि शेतकरी सहकारी सूतगिरणीतील आर्थिक घोटाळ्यांबाबतही चर्चा झाली. पडळकरांनी मागणी केली की या चौकशा वरिष्ठ अधिकाऱ्यांच्या देखरेखीखाली व्हाव्यात.

तसेच सांगलीतील पूरग्रस्त शेतकऱ्यांच्या मदतीसाठी उद्योग क्षेत्राने पुढे यावे, असे आवाहनही त्यांनी केले. “सरकारसोबतच उद्योग जगतानेही सामाजिक जबाबदारी स्वीकारून पूरग्रस्तांना मदत करावी,” असे ते म्हणाले.

Share News: