India Morning News
नवी मुंबई:पंतप्रधान नरेंद्र मोदी यांच्या हस्ते नवी मुंबई आंतरराष्ट्रीय विमानतळ (NMIA) आणि मुंबई मेट्रो लाइन-३ च्या फेज-२बीचे भव्य उद्घाटन झाले. राज्यपाल आचार्य देवव्रत आणि मुख्यमंत्री देवेंद्र फडणवीस यांच्या उपस्थितीत हा ऐतिहासिक सोहळा पार पडला. १९,६५० कोटींच्या विमानतळाने आणि १२,२०० कोटींच्या मेट्रो प्रकल्पाने मुंबईच्या पायाभूत सुविधांना नवा आयाम दिला.
लोकनेते डी. बी. पाटील नवी मुंबई आंतरराष्ट्रीय विमानतळ:
१,१६० हेक्टरवर पसरलेल्या या ग्रीनफील्ड विमानतळाची सुरुवातीची क्षमता २० दशलक्ष प्रवाशांची आहे, जी भविष्यात ९० दशलक्षपर्यंत वाढेल. सौरऊर्जा, इलेक्ट्रिक बस आणि वॉटर टॅक्सी यांसारख्या पर्यावरणपूरक सुविधांनी युक्त, हा प्रकल्प नोव्हेंबरपासून व्यावसायिक उड्डाणांना सुरुवात करेल. पहिल्या दिवशी ५०-६० उड्डाणे अपेक्षित आहेत. “हे विमानतळ मुंबईच्या अर्थव्यवस्थेला गती देईल आणि जागतिक कनेक्टिव्हिटी वाढवेल,” असे पंतप्रधान म्हणाले.
मुंबई मेट्रो-३: अॅक्वा लाइन पूर्णत्वाकडे:
३३.५ किमीच्या मेट्रो लाइन-३ च्या फेज-२बी (अचार्य अत्रे चौक ते कफ परेड) मुळे दक्षिण मुंबईतील फोर्ट, मरीन ड्राइव्हसारखे भाग जोडले गेले. ३७,२७६ कोटींच्या या प्रकल्पाने दररोज १३ लाख प्रवाशांना जलद, आरामदायी प्रवासाची सुविधा मिळेल. ‘मुंबई वन’ अॅपच्या लॉन्चमुळे मेट्रो, बस, मोनोरेल आणि रेल्वेची एकत्रित तिकिट बुकिंग शक्य होईल.
विकसित भारताचे प्रतीक:
जपानच्या सहकार्याने बांधलेली मेट्रो वाहतूक कोंडी कमी करेल, तर विमानतळ निर्यात-आयातला वेग वाढवेल. मुख्यमंत्री फडणवीस म्हणाले, “मुंबई आता प्रगतीच्या नव्या शिखरावर आहे.” या प्रकल्पांमुळे महाराष्ट्राच्या विकासाला गती मिळेल आणि ‘विकसित भारत’ ची संकल्पना प्रत्यक्षात येईल.
Comments are closed