India Morning News
मुंबई : भारत केवळ एक देश नसून, कथांची एक अशी समाजव्यवस्था आहे, जिथे कथात्मक मांडणी ही जीवनशैलीच आहे, असे प्रतिपादन रिलायन्स इंडस्ट्रीजचे अध्यक्ष मुकेश अंबानी यांनी मुंबईत आयोजित वेव्हज् शिखर परिषदेत केले. ‘Building the Next Global Entertainment Revolution from India’ या विषयावरील बीजभाषणात त्यांनी भारताच्या सांस्कृतिक आणि कथात्मक वारशाचे महत्त्व अधोरेखित केले.
अंबानी यांनी अमेरिकी लेखक मार्क ट्वेन यांचे वक्तव्य उद्धृत करत म्हटले, “भारत हा मानवी वंशाचे उगमस्थान, भाषेचे जन्मस्थान, इतिहासाची जननी, पुराणकथांची आजी आणि परंपरांची पणजी आहे.” भारतीय जीवनशैलीत कथात्मक मांडणी चिरंतन महाकाव्यांपासून पौराणिक कथांपर्यंत घट्टपणे विणली गेली आहे. “आशय हा राजा आहे आणि चांगल्या कथांना बाजारपेठेत कायम मोल मिळते,” असे सांगत त्यांनी या कालातीत तत्त्वाला जागतिक मनोरंजनाचा आधार ठरवले.
भारताच्या कथात्मक वारशाला आधुनिक तंत्रज्ञानाची जोड देत भविष्यातील जागतिक मनोरंजन क्रांती घडवण्याचे त्यांचे स्वप्न उत्साहवर्धक आहे. भारतीय कथांचा जागतिक प्रभाव आणि मनोरंजन क्षेत्रातील भारताचे वाढते स्थान यावर त्यांनी भर दिला. अंबानी यांच्या या दूरदर्शी विचारांनी परिषदेतील उपस्थितांमध्ये नव्या प्रेरणेचा संचार केला. भारताच्या सांस्कृतिक श्रीमंतीला आंतरराष्ट्रीय व्यासपीठावर नेण्याची त्यांची वचनबद्धता या भाषणातून पुन्हा एकदा दिसून आली
Comments are closed