India Morning News
मुंबईत ‘इंडिया मेरीटाईम वीक 2025’ चे भव्य उद्घाटन: भारताच्या सागरी सामर्थ्याचा नवा अध्याय
मुंबई: केंद्रीय गृह व सहकार मंत्री अमित शाह यांच्या हस्ते आणि मुख्यमंत्री देवेंद्र फडणवीस यांच्या प्रमुख उपस्थितीत मुंबईत ‘इंडिया मेरीटाईम वीक 2025’ चे उद्घाटन आज थाटात संपन्न झाले. यावेळी केंद्रीय मंत्री सर्बानंद सोनोवाल, गुजरातचे मुख्यमंत्री भूपेंद्र पटेल, ओडिशाचे मुख्यमंत्री मोहन चरण माझी, गोव्याचे मुख्यमंत्री डॉ. प्रमोद सावंत, केंद्रीय राज्यमंत्री शांतनु ठाकूर, उपमुख्यमंत्री एकनाथ शिंदे, उपमुख्यमंत्री अजित पवार आणि इतर मान्यवर उपस्थित होते.
मुख्यमंत्री फडणवीस म्हणाले, “छत्रपती शिवाजी महाराज यांच्या भूमीत हा कार्यक्रम होणे, ही भारताच्या सागरी इतिहास आणि आधुनिक प्रगतीला जोडणारी अभिमानाची बाब आहे. मुंबई, देशाची आर्थिक राजधानी, बंदरांमुळे समृद्ध आहे. पंतप्रधान नरेंद्र मोदी यांच्या नेतृत्वाखालील वाढवण बंदर जगातील टॉप 10 बंदरांमध्ये स्थान मिळवेल. हे बंदर ‘मेरीटाईम इंडिया व्हिजन’ आणि ‘मेरीटाईम अमृतकाळ व्हिजन’चा मैलाचा दगड ठरेल.” त्यांनी ‘महाराष्ट्र जहाजबांधणी, दुरुस्ती आणि पुनर्वापर धोरण 2025’ द्वारे सक्षम इकोसिस्टीम उभारण्याचा संकल्प व्यक्त केला.
केंद्रीय मंत्री अमित शाह म्हणाले, “हा भारताचा मेरीटाईम क्षण आहे. ‘गेटवे ऑफ इंडिया’ आता ‘गेटवे ऑफ वर्ल्ड’ बनत आहे. या आयोजनातून ₹10 लाख कोटींची गुंतवणूक आणि असंख्य संधी निर्माण होतील.” त्यांनी जागतिक गुंतवणूकदारांना भारताच्या सागरी परिवर्तनात सहभागी होण्याचे आवाहन केले.
महाराष्ट्रातील बंदरे देशाच्या कंटेनर ट्रॅफिकमध्ये अग्रेसर आहेत. ‘पोर्ट लेड डेव्हलपमेंट’मुळे लॉजिस्टिक आणि ब्लॉकचेन क्षेत्रात गुंतवणुकीच्या संधी वाढत आहेत. हा कार्यक्रम भारताच्या सागरी सामर्थ्याला नवी दिशा देईल.
