जीवनगौरव व राज्यस्तरीय पत्रकारिता पुरस्कार २०२५ सोलापुरात सन्मानित

Share News:

उड्डाण मंत्री मुरलीधर मोहोळ यांच्या हस्ते वितरण; पालकमंत्री जयकुमार गोरे यांची विशेष उपस्थिती

सोलापूर: महाराष्ट्र राज्य मराठी पत्रकार संघाच्या वतीने आयोजित ‘जीवनगौरव व राज्यस्तरीय पत्रकारिता पुरस्कार सन्मान २०२५’ सोहळा सोलापुरात पार पडला. केंद्रीय उड्डाण मंत्री मुरलीधर मोहोळ यांच्या हस्ते पुरस्कारांचे वितरण करण्यात आले. यावेळी सोलापूरचे पालकमंत्री जयकुमार गोरे यांची विशेष उपस्थिती होती. निर्भीड आणि निष्पक्ष पत्रकारितेची परंपरा पुढे नेण्यासाठी त्यांनी पुरस्कारप्राप्त पत्रकारांचे अभिनंदन करत शुभेच्छा दिल्या.

जीवनगौरव पुरस्काराने जन्मेजयराजे भोसले सन्मानित

यावेळी अक्कलकोट येथील श्री स्वामी समर्थ अन्नछत्र मंडळ ट्रस्टचे संस्थापक जन्मेजयराजे भोसले यांना जीवनगौरव पुरस्काराने सन्मानित करण्यात आले. तसेच, एबीपी माझाच्या सरिता कौशिक, सिद्धराम पाटील, योगेश बोरसे आणि राहुल झोरी यांना राज्यस्तरीय पत्रकारिता पुरस्कार प्रदान करण्यात आला.

पत्रकारिता म्हणजे लोकशाहीचा आधार

पत्रकारांच्या कार्याचा गौरव करणे म्हणजे लोकशाहीच्या मूल्यांचा सन्मान असल्याचे मत व्यक्त झाले. राज्यभरातील पत्रकारांनी समाजहितासाठी केलेले कार्य प्रेरणादायी आहे. शासन आणि जनतेमधील दुवा बनून पत्रकारांनी वेळोवेळी महत्त्वाची भूमिका बजावली आहे. त्यांच्या योगदानाला मान्यता देणे म्हणजे देशसेवेतील त्यांच्या कार्याची पावती आहे.

पत्रकार संघाचे कार्य कौतुकास्पद

महाराष्ट्र राज्य मराठी पत्रकार संघ ही राज्यातील सर्वात मोठी संघटना असून, पत्रकारांच्या अडचणी सोडवणे, त्यांना मदत करणे आणि पत्रकारितेच्या नीतिमूल्यांचे जतन करणे, असे महत्त्वपूर्ण कार्य संघ करत आहे. यावेळी संघाच्या कार्याचा गौरव करत पुढील वाटचालीस शुभेच्छा देण्यात आल्या.

मान्यवरांची उपस्थिती

सोहळ्यास आमदार सचिनदादा कल्याणशेट्टी, आमदार देवेंद्र कोठे, सिद्धार्थ भोकरे, संघाचे प्रदेशाध्यक्ष मनीष केत, प्रदेश सचिव सुरेखा खानोरे यांच्यासह विविध क्षेत्रातील मान्यवर आणि पत्रकार मोठ्या संख्येने उपस्थित होते.

Share News: