India Morning News
मुंबई:महाराष्ट्रातील २७६ नगरपंचायती आणि २५ नगरपरिषदांच्या निवडणुकीचा प्रचार आज संध्याकाळी ५ वाजता थंडावला. गेल्या पंधरा दिवसांपासून तालुका-गणिक रणधुमाळी सुरू होती. रस्त्यारस्त्यांवर बॅनर-फलक, माईकची गर्जना आणि प्रचाररथांच्या भेंड्या यामुळे ग्रामीण भागात निवडणुकीचा शिमगा रंगला होता.
महायुतीत गेल्या काही दिवसांपासून सुरू असलेल्या अंतर्गत कुरबुरींचा परिणाम या निवडणुकीत कितपत होईल, याकडे सर्वांचे लक्ष लागले आहे. अनेक ठिकाणी भाजप-शिवसेना (शिंदे गट) आणि अजित पवार गट यांच्यात थेट लढत असताना काही ठिकाणी बंडखोरीने चित्र गुंतागुंतीचे झाले आहे. दुसरीकडे महाविकास आघाडीनेही जोमाने प्रचार केला.
गेल्या पाच वर्षांपासून प्रलंबित असलेल्या या निवडणुकांमुळे ग्रामीण भागातील पाणी, रस्ते, स्वच्छता अशा मूलभूत समस्यांकडे दुर्लक्ष झाले होते. त्यामुळे यंदा “गावकी-भावकीपेक्षा गावाचा विकास” हा मुद्दा मतदारांमध्ये रुजला आहे, असे जाणकार सांगतात.
उद्या २ डिसेंबर रोजी सकाळी ७.३० ते सायंकाळ ५.३० वाजेपर्यंत मतदान होणार असून ३ डिसेंबर रोजी मतमोजणी होईल. एकूण ७५ लाखांहून अधिक मतदार आपला कौल देणार आहेत.
ग्रामीण महाराष्ट्राच्या राजकारणाची नस या निवडणुकीने पुन्हा तपासली जाणार आहे.
