महाकुंभातून व्हायरल झालेली मोनालिसा आता दक्षिण चित्रपटातून करणार अभिनयात पदार्पण!

Share News:

प्रयागराज महाकुंभ 2025 दरम्यान एका साध्या मुलीचा फोटो सोशल मीडियावर प्रचंड व्हायरल झाला होता. रुद्राक्षाच्या माळा विक्रीसाठी आलेल्या मोनालिसाच्या डोळ्यांनी लाखो लोकांची मने जिंकली आणि तिच्या आयुष्यात मोठा बदल घडून आला. अचानक आलेल्या प्रसिद्धीमुळे तिला मेळ्यातून घाईघाईने घरी परतावे लागले.
या व्हायरल चर्चेतूनच दिग्दर्शक सनोज मिश्रा यांनी मोनालिसाला ‘द डायरी ऑफ मणिपूर’ या बॉलिवूड चित्रपटासाठी ऑफर दिली होती. हा प्रकल्प सध्या थंडावलेला असला तरी मोनालिसाच्या करिअरला आता नवे दार खुले झाले आहे.

दक्षिणेतून मिळाली मोठी संधी
व्हायरल स्टार झाल्यानंतर बॉलिवूडबरोबरच दक्षिणेच्या चित्रपटसृष्टीनेही तिच्याकडे लक्ष दिले. मोनालिसाने इंस्टाग्रामवर जाहीर केले की ती आपल्या पहिल्या मल्याळम चित्रपट ‘नागम्मा’ मधून प्रेक्षकांसमोर येणार आहे. या चित्रपटाचे निर्माते सुप्रसिद्ध सिबी मलयिल असून दिग्दर्शनाची जबाबदारी पी. बिनू वर्गीस यांच्याकडे आहे.

कैलाशसोबत दिसणार मोनालिसा
‘नागम्मा’ मध्ये मोनालिसा मल्याळम अभिनेता कैलाश यांच्या सोबत झळकणार आहे. ‘नीलथमारा’ (2009) सारख्या चित्रपटामुळे ओळखला जाणारा कैलाश या चित्रपटाचा नायक असणार आहे. ‘नागम्मा’चे चित्रीकरण सप्टेंबरच्या अखेरीस सुरू होणार असून, कोची येथे झालेल्या पूजा समारंभाचे फोटो मोनालिसाने चाहत्यांसोबत शेअर केले आहेत.

महाकुंभातून सुरुवात झालेला प्रवास आता मोनालिसाला थेट दक्षिणेच्या रुपेरी पडद्यापर्यंत घेऊन जात आहे.

Share News: