India Morning News
पुणे: नागरिकांच्या मागणी आणि पालकमंत्री अजित पवार यांच्या निर्देशानुसार, पुणे महानगरपालिकेने (पीएमसी) नगर रस्त्यावरील सोमनाथ नगर ते खराडी जुना नाका या तीन किलोमीटरच्या पट्ट्यातील बस रॅपिड ट्रान्झिट सिस्टम (बीआरटीएस) पायाभूत सुविधा हटवण्यास सुरुवात केली आहे. गेल्या तीन वर्षांपासून वापरात नसलेली बीआरटीएस बस थांबे आणि डिव्हायडरमुळे वाहतुकीला अडथळा निर्माण झाला होता.
ही सुविधा हटवण्याचा पीएमसीचा हा तिसरा प्रयत्न आहे.नगर रस्त्यावरील 7.5 किमीच्या पट्ट्यात 2016 मध्ये बीआरटीएस सुरू झाली. यात सार्वजनिक वाहतूक बससाठी स्वतंत्र मार्गिका, रेलिंग्ज आणि मध्यवर्ती बस थांबे यांचा समावेश आहे. या थांब्यांवर दोन्ही बाजूंना प्रवेश, ध्वनिक्षेपक यंत्रणा आणि बस वेळापत्रकासाठी इलेक्ट्रॉनिक डिस्प्ले आहेत. मात्र, सध्या सुरू असलेल्या उन्नत मेट्रो प्रकल्पामुळे आणि खांबांमुळे वाहतूक कोंडीत भर पडली आहे.
पीएमसीच्या वरिष्ठ अधिकाऱ्याने सांगितले, “नागरिकांच्या तक्रारी आणि पालकमंत्री अजित पवार यांच्या सूचनेनंतर आम्ही दहा वर्षांपूर्वी उभारलेली बीआरटीएस पायाभूत सुविधा हटवण्यास सुरुवात केली आहे. ही कामे टप्प्याटप्प्याने होत आहेत.” या निर्णयामुळे नगर रस्त्यावरील वाहतूक कोंडी कमी होऊन प्रवाशांचा काही प्रमाणात सुलभ होईल अशी आशा व्यक्त केली आहे.
Comments are closed