India Morning News
मुंबई : शिवसेना (ठाकरे गट) चे खासदार आणि ज्वलंत नेते संजय राऊत सध्या मुंबईतील भांडूप येथील फोर्टिस रुग्णालयात उपचार घेत आहेत. काही दिवसांपासून ते सार्वजनिक कार्यक्रमांपासून आणि माध्यमांपासून दूर होते. मात्र आज त्यांनी रुग्णालयातून स्वतःचा एक फोटो शेअर करत चाहत्यांची मने जिंकली आहेत.
या छायाचित्रात राऊत रुग्णालयातील बेडवर बसलेले दिसतात. त्यांच्या हातावर सलाईन लावलेले असून, समोर कागद आणि पेन ठेवलेले आहेत. त्या कागदावर “Edit” असे शब्द लिहिलेले दिसतात. त्यामुळे ते ‘सामना’चा अग्रलेख लिहित असल्याची शक्यता व्यक्त केली जात आहे.
फोटोसोबत त्यांनी लिहिले —
“हात लिहिता राहिला पाहिजे… कसेल त्याची जमीन, लिहील त्याचे वृत्तपत्र – हा आमच्या पिढीचा मंत्र होता!”
त्यांच्या या पोस्टने सोशल मीडियावर प्रचंड प्रतिसाद मिळवला आहे. समर्थकांनी “लवकर बरे व्हा”, “तुमचं लेखन महाराष्ट्राची ताकद आहे” अशा शुभेच्छांचा वर्षाव केला आहे.
संजय राऊत यांची प्रकृती गेल्या काही दिवसांपासून बिघडली होती, त्यामुळे त्यांना फोर्टिस रुग्णालयात दाखल करण्यात आले. डॉक्टरांच्या सल्ल्यानुसार ते काही दिवस विश्रांती घेणार असून, वैद्यकीय तपासण्या पूर्ण झाल्यानंतर ते पुन्हा आपल्या ‘मैत्री’ निवासस्थानी परततील.
काही दिवसांपूर्वी त्यांनी कार्यकर्त्यांसाठी एक पत्र प्रसिद्ध केले होते. त्यात लिहिले होते —
“माझ्या प्रकृतीत अचानक काही गंभीर स्वरूपाचा बिघाड झाला आहे. वैद्यकीय सल्ल्यानुसार मी गर्दीत जाणं टाळतोय, पण लवकरच पूर्ण बरा होऊन तुमच्या भेटीस येईन. तुमचं प्रेम आणि आशीर्वाद असाच राहू द्या. जय महाराष्ट्र!”
संजय राऊत यांचा हा फोटो आणि संदेश पाहून संपूर्ण महाराष्ट्रातून शुभेच्छांचा वर्षाव सुरू आहे. राऊत यांची लेखणी आणि लढाऊ वृत्ती अजूनही तितकीच जोशात आहे, हे पाहून समर्थक भावूक झाले आहेत.
