India Morning News
मुंबई : मतदार याद्यांतील गोंधळ, मतदार कपात आणि मतचोरीच्या आरोपांवरून आज मुंबईत विरोधकांचा ‘सत्याचा मोर्चा’ जोरदारपणे पार पडला. या मोर्चात काँग्रेस, उद्धव ठाकरे गट, शरद पवार गट, मनसे, माकप, भाकप आणि शेकाप यांसह विविध सामाजिक संघटना आणि कार्यकर्ते मोठ्या संख्येने सहभागी झाले.
दुपारी १ वाजता फॅशन स्ट्रीटवरून सुरुवात झालेल्या या मोर्चाने मेट्रो सिनेमाजवळून मार्गक्रमण करत महापालिकेच्या मुख्य प्रवेशद्वारावर मोठी गर्दी जमवली. ‘खोट्या मतदारांविरुद्ध खरे मतदार जागे व्हा!’, ‘लोकशाही वाचवा!’ अशा घोषणा देत आंदोलनकर्त्यांनी निवडणूक आयोगाच्या भूमिकेवर तीव्र नाराजी व्यक्त केली.
मोर्चाच्या पार्श्वभूमीवर मुंबई पोलिसांनी कडेकोट बंदोबस्त तैनात केला होता. संभाव्य गर्दी लक्षात घेऊन वाहतूक मार्गांमध्ये तात्पुरते बदल करण्यात आले असून नागरिकांना CSMT परिसरात जाणे टाळण्याचे आवाहन करण्यात आले आहे.
विरोधकांच्या मते, मतदार याद्यांतील फेरफार आणि बोगस मतदारांचा मुद्दा हा लोकशाहीला धक्का देणारा प्रकार आहे. “हा मोर्चा लोकशाहीच्या बचावासाठी आहे,” असे म्हणत विरोधकांनी निवडणूक आयोगावर थेट दबाव आणण्याचा इशारा दिला.
राजकीय जाणकारांच्या मते, मुंबईतील ‘सत्याचा मोर्चा’ हा केवळ स्थानिक आंदोलन नसून राज्य आणि राष्ट्रीय राजकारणावर प्रभाव टाकणारा ठरू शकतो. आगामी मुंबई महानगरपालिका निवडणुकीच्या पार्श्वभूमीवर या मोर्चाकडे सर्वांचे लक्ष लागले आहे.
