India Morning News
नागपूर: नागपूर महानगर प्रदेश विकास प्राधिकरणाने (NMRDA) मौजा गोधणी (रिठी) आणि मौजा लाडगांव (रिठी), तालुका हिंगणा, जि. नागपूर येथील सुमारे ६९२.०६ हेक्टर जागा संपादन करून “नवीन नागपूर” अंतर्गत आंतरराष्ट्रीय व्यापार व वित्तीय केंद्र (International Business and Finance Centre – IBFC) विकसित करण्याचा महत्वाकांक्षी प्रकल्प राबविण्यास तत्वत: मान्यता दिली आहे. हा प्रकल्प विदर्भाच्या सर्वांगीण विकासासाठी मैलाचा दगड ठरणार आहे.
या प्रकल्पामुळे नागपूरला जागतिक व्यापार आणि वित्तीय केंद्र म्हणून ओळख मिळेल. यामुळे स्थानिक आणि आंतरराष्ट्रीय गुंतवणुकीला चालना मिळेल तसेच रोजगाराच्या मोठ्या संधी निर्माण होतील. स्थानिक तरुणांना आधुनिक तंत्रज्ञान आणि वित्तीय क्षेत्रातील करिअरच्या संधी उपलब्ध होतील. या केंद्रामुळे परिसरातील पायाभूत सुविधांचा विकास होईल, ज्यामध्ये रस्ते, वीज, पाणीपुरवठा आणि डिजिटल कनेक्टिव्हिटी यांचा समावेश आहे. यामुळे नागपूरचा आर्थिक आणि सामाजिक स्तर उंचावण्यास मदत होईल.
भाजपाच्या नेतृत्वाखालील महाराष्ट्र सरकारने हा निर्णय विदर्भाच्या विकासासाठी महत्वपूर्ण पाऊल म्हणून घेतला आहे. यामुळे विदर्भातील औद्योगिक आणि व्यावसायिक क्षेत्राला नवसंजीवनी मिळेल. स्थानिकांना रोजगाराबरोबरच जागतिक दर्जाच्या सुविधांचा लाभ घेता येईल. हा प्रकल्प पूर्ण झाल्यास नागपूर हे भारतातील प्रमुख आर्थिक केंद्रांपैकी एक बनण्याच्या दिशेने वाटचाल करेल.
Comments are closed