कोथरूडच्या प्रभागातील घरेलू महिला कामगारांना सन्मानधन हर्षवर्धन मानकर यांच्या हस्ते वितरण

Share News:

पुणे : महाराष्ट्र घरेलू कामगार कल्याण मंडळ, पुणे आणि दिवा प्रतिष्ठान यांच्या संयुक्त विद्यमाने कोथरूड प्रभागातील घरेलू महिला कामगारांसाठी सन्मानधन वितरण कार्यक्रमाचे आयोजन पुण्याई सभागृहात करण्यात आले. या कार्यक्रमात सहभागी झालेल्या घरेलू कामगार महिलांना शासनाच्या वतीने मिळणारे सन्मानधन वितरित प्रभागातील हर्षवर्धन मानकर यांच्या हस्ते करण्यात आले.

विशेष बाब म्हणजे, यावर्षी कोथरूड प्रभागातील जवळपास १५३ घरेलू महिला कामगारांना प्रत्येकी १०,००० रुपयांचे सन्मानधन ऑनलाइन पद्धतीने त्यांच्या बँक खात्यांवर थेट जमा करण्यात आले. या उपक्रमामुळे महिलांच्या चेहऱ्यावर समाधान आणि आनंद दिसून आला.

कार्यक्रमात बोलताना, हर्षवर्धन मानकर म्हणाले, “घरेलू महिला कामगार हे आपल्या समाजाचे आधारस्तंभ आहेत. त्यांचे जीवनमान उंचावण्यासाठी शासनाने सुरू केलेल्या या योजनांमुळे महिलांमध्ये आर्थिक सक्षमता आणि आत्मनिर्भरतेची भावना बळकट होत आहे. अशा उपक्रमांमुळे समाजातील महिलांचा दर्जा वाढेल आणि त्यांना अधिक सन्मान मिळेल.”

या वेळी सहाय्यक कामगार आयुक्त शितलताई कुलकर्णी यांनी महिलांना विविध शासकीय योजनांबाबत योग्य मार्गदर्शन केले. त्या म्हणाल्या, “घरेलू कामगारांसाठी असलेल्या कल्याणकारी योजना महिलांच्या हितासाठी आहेत. या योजनांचा लाभ घेण्यासाठी आवश्यक कागदपत्रे आणि प्रक्रिया याबाबत जागरूकता वाढवणे गरजेचे आहे.”

या कार्यक्रमाने घरेलू कामगार महिलांमध्ये उत्साह निर्माण झाला असून, शासनाच्या कल्याणकारी धोरणांचा प्रत्यक्ष लाभ मिळाल्याने त्यांच्यात आत्मविश्वास वाढला आहे.

Share News: