महाराष्ट्र स्थानिक निवडणुका नोव्हेंबर-डिसेंबरमध्ये होण्याची शक्यता

Share News:

मुंबई: महाराष्ट्रात येत्या काही महिन्यांत महापालिका, नगरपरिषद आणि जिल्हा परिषद निवडणुका होण्याची शक्यता वर्तवली जात आहे. या पार्श्वभूमीवर राज्यातील सर्वच राजकीय पक्षांनी आपापल्या तयारीला गती दिली आहे.

सूत्रांच्या माहितीनुसार, नगरपरिषद निवडणुका 15 ते 20 नोव्हेंबरदरम्यान, जिल्हा परिषद निवडणुका 15 ते 20 डिसेंबरदरम्यान, तर महानगरपालिका निवडणुका पुढील वर्षी 15 जानेवारी रोजी होऊ शकतात. विशेष म्हणजे, सर्व महापालिकांसाठी एकाच दिवशी मतदान घेण्याचा विचार सुरू आहे, ज्यात मुंबई महापालिकेचाही समावेश आहे.

राजकीय पक्षांमध्ये सध्या तयारीचा जोर आहे. भाजपने स्पष्ट केले आहे की निवडणुका महायुतीच्या तत्त्वावर लढवल्या जातील. मात्र, शिवसेना शिंदे गटाचे मंत्री गुलाबराव पाटील यांनी काही ठिकाणी स्वबळावर लढण्याचे संकेत दिले आहेत.

राष्ट्रवादी काँग्रेसचे प्रफुल्ल पटेल यांनीही काही निवडणुका स्वबळावर लढवण्याचे सूचक विधान केले आहे. दरम्यान, मनसे प्रमुख राज ठाकरे यांनी उद्धव ठाकरे यांच्या ‘मातोश्री’ निवासस्थानी भेट देत सुमारे अर्धा तास चर्चा केली, ज्यामुळे मनसे-शिवसेना ठाकरे गट युतीबाबत चर्चांना उधाण आले आहे.

राजकीय तक्त्यांवर मोठा बदल होईल की नाही, हे येत्या काही महिन्यांत स्पष्ट होईल; पण राज्यातील स्थानिक स्वराज्य संस्थांच्या निवडणुकांसाठी राजकीय रणभूमी सज्ज होत आहे.

Share News: